RUS
19 шілде күні Мәскеуде коммерциялық емес ұйым жетекшілерінің кездесуі өтті. Кездесуде Ресейдің СІМ Сергей Лавров орыс тілі мен мәдениетін шетелде насихаттау жөнінде сөз сөйледі. Баяндамасында Лавров ТМД кеңістігіндегі жағдайлар күрделеніп кетті деп баға берді. Министрдің бұлай деуіне Қырғызстанның қырғыз тілі мәртебесіне қатысты қабылдаған заңы түрткі болған. Ол бұл заң арқылы Қырғызстандағы орыс тілінің мәртебесі төмендейді деп қорқады.
«Бірнеше ай бұрын Қырғызстан заң қабылдады. Бұл идея пайда болған сәтте-ақ біз саяси достарымызға Қырғызстанда қырғыз тілін жаппай міндеттеу – демократияға сай емес екенін ескерттік», – дейді Сергей Лавров.
Еске сала кетсек, 17 шілдеде Қырғызстан президенті Садыр Жапаров жаңа заңға қол қойған. Заңда бұдан былай мемлекеттік қызметкерлер, депутаттар, ұлттық банк қызметкерлері, күш құрылымдары, сот, прокуратура, адвокаттар, нотариустар, оқу орындарының қызметкерлері, медицина қызметкерлері мемлекеттік тіл – қырғыз тілін білуге, сондай-ақ қызметін орындау кезінде пайдалануға міндетті саналды.
Заңда орыс тіліне қатысты дискриминация жоқтығына қарамастан, Ресей СІМ-і жаңа заңның қабылдануына осылай наразылығын білдірген.