RUS
Сайрам ауданы Қарабұлақ ауылдық округінде орналасқан мал бордақылау алаңдары мен мал сою бекеттерінің жұмыстары жаппай тексеріліп жатыр. Жұмыс тобының анықтауымен әзірге санитарлық талаптарды мүлдем сақтамаған 3 мал сою орыны жабылды. Қалған 8 бекеттің басшыларына мал сою алаңдарын заман талабына сай ретке келтіруге 1 ай уақыт берілді.
Осыған дейін Сайрам ауданында жергілікті кәсіпкерлерімен кездескен облыс әкімі Дархан Сатыбалды Қарабұлақ ауылдық округінде орналасқан мал сою орындарының жұмысын қатаң сынға алып, жауапты басшыларға нақты тапсырмалар берген болатын. Әкім тарапынан заңсыздықты жойып, ауылдан алыс аумақта зауыттар ашу бойынша ұсыныстар берілді. Нәтижесінде жеке кәсіпкер өз қаражаты есебінен мал сою орындарынан шыққан қанды төгетін Беккари шұңқырын дайындап, инсенератор пештерін орналастыратын болды.
Мәселені түбегейлі шешу үшін облыс әкімі жергілікті кәсіпкерлерге мал қалдықтарын терең өңдейтін зауыттар салуды ұсынған еді. Бүгін Түркістан қаласына келген сайрамдық кәсіпкерлер облыс әкіміне бірнеше ірі жобаны таныстырды. Мәселен, 25 гектар жерге мал бордақылау кешені, мал сою алаңы, етті терең өңдейтін цех құрылысы мен қанды өңдеу кәсіпорнының құрылысы басталады. Сондай-ақ, ет өнімдерін және малдың қалдықтарын терең өңдейтін зауыт салынады.
«Көршілес елден малдың қалдығын терең өңдейтін зауыт ашу жөнінде ұсыныспен келіп жатқан инвесторлар бар. Бірақ, біз алдымен жергілікті кәсіпкерлерге, сіздердің жобаларыңызға қолдау көрсетеміз. Жобаны өзіміздің азаматтардың жүзеге асыруы тиімді. Алайда, бізге нақты жоспар, жұмыстың орындалу мерзімі қажет. Бүгін сіздер ұсынған жобалар бойынша заң шеңберінде қолдау көрсетіледі. Басты мақсатымыз - жұмыс орындарын ашу, өндіріс көлемін арттыру», - деді Дархан Сатыбалды.
Сайрам ауданының Қарабұлақ ауыл округінде екі мал базары бар. Аудан бойынша тәулігіне орта есеппен 3 мыңға жуық мал сойылады.