RUS
Алматы әкімдігі мәлім еткендей, қазіргі уақытта қалалық автопарк 30 автобуспен толықты, қалған 70-і жақын арада келуі тиіс.
«Бұл автобустар есебінен жылжымалы құрам №37, 38, 38а және 201 маршруттарда жаңартылады. Әрі №24, 125, 131 маршруттарға автобустар қосылады, яғни қолданыстағы маршруттар жаңа автобустармен толығады», - делінеді әкімдіктің хабарламасында.
Еске салсақ, бұған дейін Алматы әкімі Ерболат Досаев халықпен кездесулерде 2023 жылы Алматыда қосымша 600 жаңа автобус сатып алынатынын айтқан.
«Қоғамдық көлікті дамыту біз үшін басты басымдықтардың бірі. Халықтың шағымының дені қоғамдық көлік жұмысының сапасына, атап айтқанда, кейбір қолданыстағы маршруттардың жайсыздығына және жоспарлы қозғалыс аралығын сақтамауға қатысты. Сондықтан біз бұл мәселелерді шешуді қолға алып жатырмыз», - деген болатын Ерболат Досаев.
Қалған 500 автобусты сатып алуға шарт жасалды.
Айта кетейік, бүгінгі күні Алматыда барлығы 2000-нан астам автобус, 163 маршрут, 24 тасымалдаушы жұмыс істейді.