RUS
Киностудия ұжымына жаңа басшыны Мәдениет және спорт министрі Асхат Оралов тағайындады.
- Отандық киноөнерінің «қара шаңырағы» саналатын Қазақфильм ауқымды және күрделі өндірістік ұйым. Былтыр киностудия жанынан «Қазақанимация» шығармашылық бірлестігі құрылды. Мемлекет басшысының киностудия жұмысын жаңғырту жөніндегі тапсырмасын жүзеге асыру аясында 87 техникалық жабдық сатып алынды. Алдағы уақытта, модернизацияның 2 кезеңін бастау керек,- дейді Асхат Оралов.
Министрлік 2030 жылға қарай жалпы кинопрокаттағы отандық фильмдердің, оның ішінде анимациялық фильмдердің үлесін 35%-ға дейін ұлғайтпақшы. Ал прокаттағы қазақ тіліндегі фильмдердің үлесін 30%-ға дейін жеткізу көзделіп отыр.
Азамат Сатыбалды ұзақ уақыт М.Әуезов атындағы Қазақ мемлекеттік академиялық драма театрында еңбек етті, Ғабит Мүсірепов атындағы қазақ мемлекеттік академиялық балалар мен жасөспірімдер театрын 3 жыл бойы басқарды. Сондай-ақ «28» тәуелсіз театрын ашқан болатын. 2022 жылдың ақпанынан бері Т.Жүргенов атындағы Қазақ ұлттық өнер академиясының ректоры қызметін атқарды.