Елімізде бір жылда азық-түлік 8,1%-ға қымбаттаған

Ұлттық статистика берген ақпаратқа сәйкес, баға индексі өткен аптада 0,1%-ға төмендеген. Дегенмен бір жылда азық-түлік бағасы 8,1%-ға өскен

Әлеуметтік маңызы бар азық-түлік тауарларының тізбесіне 19 атау кіреді. Оның ішінде ҚР бойынша әлеуметтік маңызы бар кейбір тауарлардың орташа бағасы мынадай:

Сары май – 3710 тг/кг (0,2% қымбаттаған);
Сүт – 374 тг/л;
Қырыққабат – 148 тг/кг (3,1% қымбаттаған);
Сәбіз – 193 тг/кг (0,5% арзандаған).

Одан бөлек қарақұмық, картоп, қант, күнбағыс майының бағасы 0,4-0,5%-ға арзандаған.

Еске сала кетсек, баға өзгерісі туралы көрсеткіштерді Ұлттық статистика бюросы апта сайын жаңартып отырады.

Бағаның өзгеруі туралы ақпарат барлық облыс орталығынан, республикалық маңызы бар қалалардан және астанадан жиналады. Ол үшін елдімекеннің әртүрлі бөліктерінде орналасқан тауарлардың кең ассортименті бар әртүрлі типтегі сауда объектілері (гипермаркеттер, супермаркеттер, дүкендер, коммуналдық базарлар, әлеуметтік дүкендер мен павильондар) таңдалады.