RUS
Түркістан облысының климаты жылы болғандықтан ірі өндірістік кәсіпорындарға қарағанда ауыл шаруашылығы саласы жақсы дамыған аймақ. Соның ішінде мақтаның орны бөлек.
Биыл шитті мақта сапасын жақсарту мақсатында Түркістан облысы мен Түркия мемлекеті арасында ынтымақтастық орнатылып, өнімділігі жоғары сапалы мақта тұқымын импорттауға мүмкіндік туды. Нәтижесінде, Түркия елінен 248,2 тонна элиталық тұқым, Өзбекстан мемлекетінен 967,5 тонна тұқым жеткізілді.
«Мақта мәселесі жыл он екі ай күн тәртібінен түскен емес. Бағаны көтеру, субсидия беру, терең өңдеу кәсіпорындарын ашу сынды шаруалардың ұсыныс-тілектері облыс әкімдігінің басты назарында. Агроқұрылымдардың сатып алған тұқымының құнын арзандатуға биылғы жылы 600,0 млн теңге қаржы бөлініп, мақта шаруашылықтарына 150,0 млн теңге қаржы төлеу жоспарланып отыр», - деді Ермек Кенжеханұлы.
Өткен жылы Түркиядан 105 тонна элита, Өзбекстаннан 423 тонна екінші көбейтілген тұқым импортталып егіске пайдаланылған. Ал биыл бұл көрсеткіш екі есе артып отыр.