RUS
Астана әкімдігінің ресми сайты берген ақпаратқа сәйкес, Нұра ауданында 6 тұрғын үй кешенінен қаланың келбетін бұзатын 60-тан астам маңдайша мен сыртқы жарнама алынып тасталған. Себебі олардың бәрі 2019 жылы бекітілген Астана дизайн кодына сәйкес емес боп шықты.
- Кәсіпкерлерге дизайн код бойынша қиын талаптар қойылған жоқ. Ең бастысы, белгілер ғимараттың қасбетіне бейімделуі керек және визуалды шу тудырмауы керек. Қала үлкейіп, дамып келеді және оның біртұтас келбеті болуы тиіс, – деп атап өтті Нұра ауданы әкімі орынбасарының міндетін атқарушы Әлия Әбсеметова.
Аудан әкімдігі өкілдерінің айтуынша, орталық көшелер бойында орналасқан тағы 4 тұрғын үй кешені кезекте тұр. Бірте-бірте аудандағы белгілер мен жарнамалардың бәрі ретке келтірілмек.
Еске сала кетсек, Астанада қала келбетін дизайн кодқа сәйкестендіру бойынша жұмыс белсенді түрде жүріп жатыр. Қазіргі уақытта 1500-ден астам заңсыз орнатылған белгі мен жарнамалық баннер мониторинг нәтижесінде алынып тасталды.