RUS
СҚО ветеринария басқармасы баспасөз қызметінің мәліметінше, сәуір айының басынан қаңғыбас ит-мысықты ұрықсыздандыру бойынша жұмыс жүріп жатыр. Осы аралықта иесіз жүрген 135 үй жануары ауланып, есепке алынды, піштіріліп, чип салынды. Алайда, 108-і қайтадан көшеге жіберілді.
«Өңірде былтырдан бері «TANBA» атты үй жануарларын есепке алу ақпараттық жүйесі жұмыс істейді. Оған барлық аудандар мен облыс орталығының ветеринарлық станциясы қосылған. Осы аралықта 1 550 жануар, соның 165-і иесіз, есепке алынды. Соның 963-і – ит, қалғаны – мысық», - дейді басқарманың баспасөз хатшысы Аманжол Нұртазин.
Маманның айтуынша, қазіргі уақытта ит-мысыққа чип салдыру жұмысы қызу жүріп жатыр. Бұл мақсатқа облыс бюджетінен 2,7 млн теңге бөлінді.
«Петропавл қаласының ветстанциясы 1 мың чип сатып алды. Аудандар да чип алу үшін мемлекеттік сатып алу жүргізеді. ҚР Әкімшілік кодексіне сәйкес, үй жануарларына чип салу талабын орындамаған тұрғындарға 10 АЕК – 34 500 теңге мөлшерінде айыппұл бар. Лауазымды тұлғаларға 20 АЕК – 69 мың теңге, заңды тұлғаларға 30 АЕК – 103 мың теңге айыппұл қарастырылған», - дейді Аманжол Нұртазин.