Алматыдағы тауда жоғалған ресейлік туристің өлі денесі табылды
Сенбі күні тауға шығамын деп жоғалып кеткен ер адамның мәйіті табылды. Бұл туралы smartnews.kz сайты хабарлайды.
Бүгін Алматы тауларында іздестіру-құтқару жұмыстарын жүргізу кезінде ер адамның денесі табылды. Алдын ала деректер бойынша ол төрт күн бойы іздестіріліп жатқан турист. Ресей Федерациясының 1984 жылы туған азаматы 5 тамызда таңертең тауға кетіп, жоғалып кеткен болатын.
- Таудағы климаттың күрделілігіне, тау маршрутының ерекшеліктеріне, тастың құлауына және жартасты рельефке қарамастан іздеу-құтқару жұмыстары тәулік бойы жүргізілді, - делінген ТЖМ ресми хабарламасында.
Сондай-ақ ведомство ұсынған деректер бойынша Қазақстандық құтқарушылар жыл сайын тауда 160-қа жуық туристті құтқарады. Биылғы жылдың басынан бері таулы жерлерде 152 адам құтқарылған.