RUS
Әкім Шәкір Кейкиннің айтуынша, Атырау қаласында орналасқан еліміздің тұңғыш академигі Қаныш Имантайұлы Сәтбаев ескерткішінің бүгіндегі сыйқы жоқ. Бұған себеп, ел сыйлаған ағамыздың жалғыз ескерткішінің басына көгершіндер қонып, құстардың мекеніне айналған. «Арнаулы автобаза» қызметкерлері қажетті тазалық жұмыстарын жүргізгенмен, бәрібір ескерткіш бұрынғы қалпына қайта түсіп отыр.
Кейкин бұл мәселені шешу үшін бүгін учаскелік полиция, «Арнаулы автобаза» ЖШС басшысы және жауапты бөлім басшыларымен бірге аталған орынға барып қайтқан.
- Расымен, тазалық жұмыстары жүргізілгенмен, қайтадан қоректенуге келген құстардың боғынан алаңда аяқ алып жүру мүмкін емес, антисанитарлық жағдай десек артық болмас. Осы мақсатта қала тұрғындарына бұл жерге келіп құстарды қоректендірмеуге ұсыныс білдіремін әрі арнайы хабарландыру жазылып, таратылатын болады, - дейді әкім өзінің Facebook-тегі жеке парақшасында.
Сондай-ақ әкім ескерткіш кейпін тазалықта сақтау үшін полиция басшылығы алдағы уақытта көгершіндерге тамақ қалдығын тастаған азаматтар мен азаматшыларға абаттандыру қағидасын бұзғаны үшін құқық бұзушылық талаптарына сай шара қолданатынын айта кетті.
- Әрине, көгершін - бейбітшілік символы екені сөзсіз. Бірақ, бүгінгі ескерткіш басындағы көрініс бұл түсінікке сай келмейді. Қазақтың маңдайына біткен нар тұлғамыз, өмірге екі келмейтін ағамыздың ескерткішіне сыйластықпен қарап, тұрғындар менің ұсынысымды қолдайды деп есептеймін. Осы мақсатта қала тұрғындарын бұл жерге келіп, көгершіндерге нан қалдықтары мен басқа да тағамдарды тастамауға шақырамын!, - дейді қала әкімі.
Әкімнің үндеу жазбасының пікір алаңында қала тұрғындары бұл ұсынысты қолдай кетті. Себебі дәл осы мәселе бұған дейін біраз уақыт еленбеген жайт болып шықты.