Маңғыстаудың жарығы қайта оралды: МАЭК іске қосылды
Апатты жағдайдан соң МАЭК-тің жөндеу жұмысы толық аяқталды. Бұл туралы smartnews.kz сайты хабарлайды.
Маңғыстау облысы әкімдігі баспасөз қызметінің хабарлауынша, №3 энергоблок қайта іске қосылды.
- Жұмыс барысында генератор роторының байланыс сақиналары мен оқшаулағыш жеңі жөнделді. Оқшаулау өлшемі оң нәтиже көрсеткен соң щеткалы-байланыс аппараты орнатылды. Одан соң энергоблокты іске қосуға дайындық жұмыстары жасалды. Жөндеу жұмыстары үзіліссіз тәулік бойы жүргізілді. МАЭК қызметкерлері орын алған төтенше жағдайды тезірек жою үшін жұмыла еңбек етті, - делінген баспасөз хабарламасында.
Энергоблок 19 тамызда іске қосылған. Бүгін сағат 12:00-дегі жағдай бойынша электр энергиясын берудегі барлық шектеулер алынып тасталған. Дәлірек мұнай және өнеркәсіп секторын қоса алғанда, енді шектеулер орнамайды.
Еске сала кетсек, МАЭК 2-ЖЭО екі турбоагрегаты 11 тамызда тоқтаған болатын. Оқыс оқиғадан кейін облыста электр қуаты үзілген.