RUS
Талдықорғандағы Ынтымақ ықшам ауданында 1200 балаға арналған ғимарат құрылысы жүріп жатыр. Төрт жарым мың адам тұратын елдімекенде мектеп болмаған. Сондықтан оқушылар екі, үш шақырым жердегі қалаға қатынап оқып келген.
2021 жылы басталған құрылыстың мердігер мекеме 90%-ын аяқтаған. Құрылыс алаңында қазір де 150 шақты адам еңбек етіп жатыр.
- Қазір есіктерін күтіп отырмыз. Есіктерін салғананнан кейін бояу жұмыстарын жүргіземіз. Сыртқы жұмыстарының асфальты салынып тұр. Екінші қабатын саламыз. Чернозем төгіп қойдық, енді шөп егу қалды. Гүлдерді отырғызып қойдық, - дейді құрылыс учаскесінің бастығы Талғат Кәрібжанов.
Жоспар бойынша нысан қазан айының соңында ел игілігіне беріледі. Сол кезде Ынтымақ, Жастар және Үшінші бөлімше деп аталатын ықшам ауданындағы оқушылар жаңа мектепте білім алатын болады.
- Нысанның шарт бойынша құны 3,5 млрд теңгені құрайды. Оның ішінде білім беру ұйымдарының инфроқұрылымын қолдау қорынан 1,8 млрд теңге бөлінген. Қалғаны бюджеттен бөлінген. Қазір жұмыс графикке сай жүргізілуде, - дейді облыстық құрылыс басқармасы басшысының орынбасары Бауыржан Орманов.