«30 жыл тұрған үйімді бұзасыңдар ма?»: Елордадағы ескі үйлерді құлату ісіне кейбір тұрғындар қарсы шықты

Бірін мазалаған ескі үйлердің қирағалы тұрған құрылысы болса, бірін аумақтың көгалдандыру мәселесі болды.

Қала тұрғындарының бірін өзі тұрып жатқан тұрғын үй бұзылса, қайда қоныстаймын деген сауал мазалаған. Оның айтуынша Байқоңыр ауданындағы Бөгенбай даңғылында орналасқан жер үйлер қиратылмақ. 100 жылдан астам уақыт бұрын салынған.

- Ол жерде шамамен 50-60 шақты үй қалды. Біздің үйімізге 100 жыл болды. Кейбір жылдары бұл үйде Сәкен Сейфуллиннің өзі тұрған. 1933-34 жылдары. Біздің онда тұрып жатқанымызға 30 жылдан кетті. Біздің аумақта су жоқ, үйді пешпен жылытып отырмыз. Біздің үйіміз биыл қиратыла ма? - деп көзіне жас алды егде жастағы тұрғын.

Сондай-ақ Бөгенбай даңғылы мен Айманов көшесі кварталында ешқандай демалыс орны, парк-сквер жоғын сөз етті.

Бұл мәселеге қатысты Байқоңыр ауданының әкімі Ерлан Жаулыбаев пікір білдірді. Әкімнің айтуынша, ондағы жер үйлер 2028 жылға дейін бұзылмайды. Республикадан немесе өңірлік бюджеттен ақша бөлінсе ғана үйлерді қирату басталатынын жеткізді.

Айта кетсек, Астана Бас жоспары” ғылыми-жобалау жоспарлау институтының дерегінше, 730,0 гектар жердегі аз қабатты үйлер, саяжайлар мен гараждардың шамамен 176,5 мың шаршы метр жері бұзылмақ. Бұл 2025 жылға дейінгі жоспар. Ал 2035 жылы бұл сан 731,5 мың шаршы метрге өссе, 2050 жылы 350,2 мыңға азаймақ.