RUS
Экс-депутат, әрі “Бауырлас” қоғамдық бірлестігінің басшысы Тәңірберген Бердоңғаров бүгін “Астана Бас жоспары” ҒЖЖИ өткізген талқылауында маңызды сауалдарды көтерді. Бердоңғаровтың айтуынша, Астанадағы көпқабатты үйлерден құлап қайтыс болатын адамдардың өліміне бас қаламыздағы үйлердің құрылысы кінәлі.
— Естіген боларсыздар, жақында “Балқадиша” ТҮК-нен бір адам терезеден секіріп, мерт болды. Жалпы алғанда, сіздер өте жақсы білесіздер Астанадағы маңызды мәселелердің бірі - адамдардың терезеден секіріп жиі қайтыс болуы. Мұнда бір психологиялық ауытқу да бар. Өйткені көптеген әкімдер билікке келгенде “тек менің кезеңімде осылай болмаса екен” деп тілеп отырады. Нәтижесінде жаңа аудандардың сызбасын мақұлдағанда бір “қораптардың жиынтығын” салуға рұқсат етеді, - дейді қоғам қайраткері Тәңірберген Бердоңғаров.
Алматы ауданындағы жаңа тұрғын үйлердің жөнсіз, әрі тым көпқабатты салына беруін “қораптардың жиынтығы” деп сынаған экс-депутат қаламыз адамдарға өмір сүруге ыңғайсыз урбанистикалық ыңғайсыз өңірге айналып бара жатқанын тілге тиек етті.
— Адамдар ауылдан келіп, мына вокзалдан шыққан бойда көретіні LRT-ның бітпеген бағандары мен тізілген қораптарды ғана көреді. Жақын аралықта арамыздағы тұрғындардың уәжіне құлақ асасыздар ма? Ауданымызда демалып, серуендейтін дені дұрыс парк жоқ. Тұрғындар төртбұрышты “қораптарында” ғана серуендей ме? - деп шағымданды экс-депутат.
Оның бұл сауалына “Астана Бас жоспары” ҒЖЖИ ЖШС директорының орынбасары Серік Әбдірахманов жауап берді. Спикердің айтуынша, Алматы ауданында “Нұржол” бульвары секілді Қалибек Қуанышбаев академиялық ұлттық театрының артынан “Нұрлы жол” вокзалына дейін созылатын аллея болатынын айтты. Одан бөлек, Щебсклад СҰ маңынан жағалау орнамақ. Серік Әбдірахмановтың айтуынша, бұл жобалар 2035 жылға дейінгі бас жоспарға еніп отыр.