RUS
Астанада Тәжікстанның мәдениет күндері өтіп жатыр. Аталған шара аясында ұлы ғалым әрі ойшыл Әбу Әли ибн Синаның бюстінің ашылуы Астана қаласында аталып өтті. Бұл туралы ҚР Мәдениет және спорт министрлігінің баспасөз қызметі хабарлады.
Ведомствоның дерегінше, салтанатты рәсімге ҚР Мәдениет және спорт министрі Асхат Оралов, Тәжікстан Республикасының Мәдениет министрі Зульфия Давлатзода, сондай-ақ Астана қаласы әкімдігінің өкілдері, Қазақстан мен Тәжікстанның шығармашылық зиялы қауым өкілдері және т.б. қатысқан.
«Бүгін елдеріміздің арасында екіжақты қатынастар тарихындағы өте маңызды күн. Ибн Сина – бүкіл Орталық Азияның мақтанышы, сондықтан бұл ескерткіш біздің елдеріміз арасындағы терең тарихи байланысты көрсетеді. Монументтің ашылуы – бұл Қазақстандағы Тәжікстанның мәдениет күндері аясында өтетін іс-шаралардың бірі. Астана, Алматы және Шымкент қалаларында кино көрсетілімдері, концерттер мен көрмелер өтіп жатыр. Ауыл шаруашылығы жәрмеңкелерін өткізу жоспарланған», - деп атап өтті ҚР Мәдениет және спорт министрі Асхат Оралов.
Ғұламаның ескерткіші Астана қаласының Алматы ауданы А.Храпатый көшесі, 9 жанындағы саябақта орнатылған. Қола бюсті тәжік шеберлері жасаған, ал гранитті тұғырды елорда әкімдігі ұсынған. Ескерткіштің биіктігі – 3,1 м.