RUS
Астана қаласының қылмыстық істер жөніндегі ауданаралық сотының дерегінше, М. 2021 жылдың желтоқсанында Instagram қосымшасында «egov_kz» деген логинмен емтихан тапсырусыз жүргізуші куәлігін дайындау мүмкіндігі туралы хабарландыру жариялаған.
2021 жылғы желтоқсан мен 2022 жылғы сәуір айы аралығында жүргізуші куәлігін сатып алуға шешім қабылдаған 19 азамат М.-ге 10 мыңнан 150 мың теңгеге дейінгі сома мөлшерінде ақшалай қаражат аударған. Ал М. ұрланған қаражатты өз қалауы бойынша пайдаланған.
Сотталушының кінәсі жәбірленушілердің айғақтарымен, «WhatsApp» қосымшасындағы хат-хабарлармен, банктік түбіртектермен және қылмыстық іс бойынша басқа да материалдармен дәлелденген.
- Сот қылмыстық жауаптылық пен жазаны жеңілдететін мән-жайлар ретінде кінәні мойындауын, шын жүректен өкінуін, жас баласының болуын және келтірілген залалды ерікті түрде ішінара өтеуін таныды. Сотта ауырлататын мән-жайлар анықталған жоқ. Сот үкімімен М. ҚК-нің 190-бабы 3-бөлігінің 4) тармағында көзделген қылмыстық құқық бұзушылық жасағаны үшін кінәлі деп танылып, 3 жыл 6 ай мерзімге бас бостандығын шектеу түріндегі жаза тағайындалды. Жәбірленушілер, сотталушы және прокурор сот үкіміне шағымданбады, - делінген хабарламада.
Үкім заңды күшіне енді.