RUS
Еліміздегі ірі операторлардың бірі — Kcell компаниясының 25 жылдығына орай Астана мен Түркістан қаласының қызметкерлері бір мезетте 5 және 10 шақырым қашықтыққа жүгірді.
«Өздеріңізді алдымен еліміздің ірі мобилді байланысы Kcell компаниясының 25 жылдығымен құттықтауға рұқсат етіңіздер!
Бүгінгі «5G KcellRUN» марафоны – бірден-бір бұқаралық спортты дамытудағы үлкен қадам.
Шынайы пейілдеріңізбен бүгінгі сенбінің таңында ұйымдастырылған іс-шараға қатысуға белсенділік танытқандарыңызға алғысымды айтамын.
Өздеріңізді бүгінгі марафонның межесіне жеңіл жетулеріңізді тілеймін.
Жүгіруді дағдыға айналдырған тұрғындарымыздың саны арта берсін!» — деп іс-шараның ашылу салтанатында Астана қаласының Дене шынықтыру және спорт басқармасы ММ басшысы Самат Жылқыбаев құттықтады.
10 шақырымдық жарыста жеңіл атлетикадан ел чемпионатының қола жүлдегері Әлімжан Балтабек қарсылас шақ келтірмесе, әйелдер арасында Гүлнүр Елемесова топ жарды. Ал 5 шақырымда Дмитрий Адамович (ерлер) және Ева Пинчук чемпион атанды.
Жүлде қоры 10 млн теңгені құрап, жеңімпаздар ақшалай және медальмен марапатталды.