RUS
Бүгін екі бірдей концерт зал уақытша жабылатынын жеткізді.
Астанадағы Роза Бағланова атындағы «Қазақконцерт» мемлекеттік концерттік ұйымы» МКҚК орналасқан «Qazaqstan» орталық концерт залы уақытша жабылатынын жеткізді. Оған себеп концерт залының маңындағы аумақта су құбыры желілерінде техникалық жұмыстар жүргізетіні. Сол үшін қонақтарды қабылдауға және бұл аралықта кез келген іс-шараны өткізуге мүмкіндік болмайтыны туралы хабарлады.
"Роза Бағланова атындағы «Қазақконцерт» МКҰ-ның жоспарланған концерттері: 4 қазан - «Халық қазынасы» ұлттық өнер орталығының солисі Әлихан Дүйсенбайдың концерті, 6 қазан - «Халық қазынасы» ұлттық өнер орталығының солисі Айзат Қарабектің концерті, 7 қазан - «Қазақконцерттің жас таланттары» концерті болмайды.
Сонымен қатар, 8 қазанға жоспарланған М.Галкин концертінің Ұйымдастырушысы техникалық жұмыстар жүргізілуі бойынша мемлекеттік органның актісіне сәйкес, туындаған жағдай туралы ресми түрде хабарландырылғанын, Келісім-шартты біржақты бұзу туралы тиісті хабарлама жолданғанын хабарлаймыз.
2023 жылғы қазанның 4-10 күндері аралығына жоспарланған концерттік іс-шараларға билеттердің сатылымы тоқтатылуы, сатылған билеттер қайтарылуы тиіс", - делінген QazaqConcert парақшасында.
Сондай-ақ 2023 жылғы 1 қазаннан бастап Республика Сарайы жабылады. Оған себеп сахнаның апатты жағдайда болуы екен.
"Жөндеу-қалпына келтіру жұмыстары мамандарының бағалауы бойынша бұзушылықтарды жою жөніндегі нұсқаманы орындау үшін екі апталық мерзім қажет. Сол себепті осы мерзімге жоспарланған барлық концерттер тоқтатылады.
«Алматы әуендері» КМҚК әкімшілігі жөндеу-қалпына келтіру жұмыстарын тезірек аяқтау үшін барлық тиісті шараларды қолданады" - делінген Алматы әуендері парақшасында.
Максим Галкиннің концерті өтетін тұста екі бірдей концерт залдың жабылуына көрермендер наразы боп отыр. Олар бұған себеп - Галкиннің Ресейде "иноагент" тізіміне енуі.