RUS
Желідегі кадрларда ит өз иесінің арбасын сүйреп, ал бағдаршамның қызыл түсі жанған кезде оны тоқтатады. Жануардың қожайынына деген адалдығы желі қолданушыларын қайран қалдырды.
"Бүкіл адамға үлгі болды мына ит", "Ит адамның адал досы деп бекер айтпаған", "Қанша адам ата-анасын қарттар үйіне тастап жатыр. Оларда мұндай мейірімділік жоқ", “Бұл атаға жақындасаң, иті қауып алады”, – деп жазылған пікірлерде.
Кейін 7 қазанда Тараз қаласының полицейлері көшелердің біріндегі жолдың ортасында төңкерілген мүгедектер арбасы және қарт адам мен итті байқаған. Құқық қорғаушылар Хатико мен оның иесі Анатолий Дербеновті бірден танып қолғабыс етуге келген.
Анықталғандай зейнеткер жасанды кедергілерден өте алмай, арбасымен аударылып қалған. Ал оның иті осы уақыт ішінде иесін мұқият күзетіп, жанында отырған. Полиция қызметкерлері бірден қарт кісіге көмекке ұмтылғанда ит иесіне ешкімді жолатпаған.
“Ит тістеп алуы мүмкін еді. Қаладағы барлық адамдар оның қабаған екенін біледі. Иесін әрдайым қорғайды. Біздің басты міндетіміз - қарияға көмек көрсету болды. Себебі ол басын жарақаттап алған”, – деді Тараз қалалық ПБ ППБ 1-взвод командирі Нұрбол Мырзакерім.
Құқық қорғаушылар кейін иттің қожайынына көмек келгенін түсініп, жанына жақындауға мүмкіндік бергенін айтты.
Қазіргі уақытта қария мен оның иті дәрігердің қарауынан кейін үйіне жіберілген.