RUS
Салтанатты шараға Түркия елшілігі, елорданың зиялы қауым өкілдері, ардагерлер және Астана қаласы әкімдігінің өкілдері қатысты.
Аталған іс-шараны ҚР Парламенті Сенатының депутаты, Халықаралық түркі академиясының президенті, танымал түрколог, академик Дархан Қыдырәлі құттықтау сөзімен ашты.
«Түркия Республикасының 100 жылдығы құтты болсын! Осы 100 жылдық мерекенің қарсаңында біздің руханиятымыздың архитекторларынан саналатын Қожа Ахмет Яссауидың жолын батыста жалғаған, түркі тілінің өрісін кеңейткен Юнус Эмренің ескерткішінің елордада ашылуы өте мағыналы деп білеміз. Бұл ескерткіштің эскизі жасалып жатқанда көрген едік. Тура мерекенің қарсаңында ашылып отыр» – деді Дархан Қыдырәлі.
Ескерткіштің салтанатты ашылуына арнайы қатысқан Түркия Республикасының Қазақстан Республикасындағы төтенше және өкілетті елшісі Мұстафа Капуджу да осындай тарихи сәтте жүрекжарды тілегін айтты.
«Түркияда да қазақтың ұлы ойшылы Абайдан бастап өзге де дарынды тұлғаларына арналған саябақтар, ескерткіштер бар. Бұл іс- шара - екі елдің тарихының ортақ екенін еске салатын шара деп ойлаймын» - деді Мұстафа Капуджу.
Бұдан соң ҚР Парламенті Сенатының депутаты Дархан Қыдырәлі, Түркия Республикасының Қазақстан Республикасындағы төтенше және өкілетті елшісі Мұстафа Капуджу, сондай-ақ Байқоңыр ауданы әкімі Талғат Рахманберді Юнус Эмреге арналған ескерткішті ашты.
Тарихи сәттен соң елшілік пен елорда әкімшілігі атынан гүл шоқтары ескерткішке қойылды.
Басқа да маңызды жаңалықтар Telegram арнамызда!