Министр қаза тапқан кеншілердің толық тізімі қашан жарияланатынын айтты

Қазір шахтадағы апаттан қаза тапқан 40 кеншінің жеке басы анықталған, қалған 6 кеншінің кім екенін анықтау үшін ДНҚ сараптамасы жүргізіліп жатыр.

Қазір қаза тапқан 6 кеншінің кім екенін анықтап жатырмыз. ДНҚ сараптамасын жүргізуді жоспарлап отырмыз. Осыдан кейін (қаза тапқан кеншілердің тізімі туралы) айтуға болады. Бұл жұмыс 3-4 күнді талап етеді, - деді министр.

Премьер-министрдің орынбасары Тамара Дүйсенова марқұм болған кеншілердің қанша жалақы алып келгенін айтты.

Біз (қаза тапқан кеншілердің) жалақысын «Отбасының цифрлық» картасынан қарадық. Олардың еңбекақысы 300 мың теңгеден 1 млн 600 мың теңгеге дейін болған. Оның ішінде жастар да бар. Жұмысқа енді тұрғандары бар. Сондықтан кеншілердің жалақысында үлкен алшақтық бар, - деді ол.

Қарағанды облысының әкімі Ермағанбет Бөлекпаевтың дерегінше, шахтадағы апаттан зардап шеккен 27 кенші ауруханада ем алып жатыр. Олардың бірінің жағдайы ауыр.