RUS
Алматының тұрғындарын алдап, миллиардтаған теңгесін үптеп кеткен әйелдің үстінен жуырда 21 адам арызданған екен. Оның тергеуі жүргізілгені және үйқамақта отырғаны айтылғанымен, сол алданған адамдардың өздері көшеде адамдарды тағы да алдап жүрегін көріпті.
Ол әйел адамдарды алдап-арбау үшін бар өнерін салып, Қытайдағы өндіруші компаниялардан тауарды арзан бағаға жеткізіп беремін, қолымда пәленбай адам жұмыс істейді деп сендіретін болыпты. Не керек, әлгі арызданған 21 адамның өз қолдарымен берген ақшалары шамамен 3 миллиард теңгеге барған көрінеді. Арызданушылардың тізіміне енбеген алданғандар да аз емес деп жатыр.
Әлгі әйел тапсырысты Whatsapp арқылы қабылдайды екен. Ешқандай келісім-шартсыз, ауызекі уәдемен-ақ миллиондаған теңге ақшаны шотына телефон арқылы аудартып ала қояды екен. Содан ертең-ертеңмен тойдырып, созбалаңға салады.
Фото: Instagram / aray_aray94
Алданғандар Қытай зауыттарынан тауар сататын Whatsapp желісіндегі топқа ақша төлеп қосылған екен. Ұнағанын таңдап, тапсырыс берген. Әлгі әйел тауардың уақтылы берілетініне көтерме саудамен айналысқысы келетін адамдардың көздерін жеткізген соң олардан миллиондарға тапсырыс қабылдаған. Бірақ соңында ақша да, тауар да жоқ болып шыққан. Көтерме саудамен айналысатындардың өзі тауарды алатын клиенттерінен ақша жинап өткізген. Осыдан барып сол көтерме саудагерлердің әрқайсысының соңынан қыруар ақшасын ала алмай шұбап жүрген адам көп.
Не деген жанкешті алаяқтық десеңізші. Ешбір ойланбастан көп адамнан ақша жинап, миллиардтаған теңгені иемденіп түк болмағандай болып жүре беру үшін қандай адам болу керек? Таң қаларлық емес пе? Алаяқтық әрекетті істеушілер заңнан қорықпайтын болса керек. Оларға қатысты заң қатал емес деп жатады. Көп жағдайда бас бостандығынан айыру жазасының тағайындалуына жеткізілмей ме, кім білсін. Әйтеуір бүгінде алаяқтардан батыр адам жоқ. Құқық қорғау органдарының қызметкерлері алаяқты мазалауға да құқығын бұзбайын деп бата алмайтын сияқты әсерде қаласыз. Адамдар да алды-артын ойламайтын болып барады. Әлгі әйелге 400-500 миллион теңгелеп бергендер көп.
Алматы қалалық полиция департаментінің мәліметінше, ақшасын беріп алданып қалғандар 130 адам. Ішінде 600 миллион теңге бергендері де бар.
Ел ішінде сөз жата ма, бұл жағдай туралы әңгіме Парламент Мәжілісіне де жетті. Депутаттар бұл не деген масқара деп алаңдап, Бас прокуратураға депутаттық сауал жолдады. Елді қан қақсатқан әйелдің толық аты жөні де Парламент Мәжілісінде аталды.
Депутат Дәулет Мұқаев жалпы алаяқтық жағдайға тоқталды, статистикалық деректерді келтірді. 2022 жылдың өзінде интернет алаяқтық бойынша 20 444 дерек тіркеліп, 16,5 миллиард теңгеге залал келген. Ал биыл жыл аяқталмаса да, 15 мыңға жуық дерек тіркеліп, зардап саны 11 миллиардтан асты. Алаяқтардың құрбандары – көбінде үйде отырған аналар мен қыз-келіншектер көрінеді.
Фото: parlam.kz
Дәулет Мұқаевтың айтуына қарағанда, Интернет алаяқтықтың түр-түрі бар. Ол соңғы уақытта кеңінен етек жайып келе жатқан әлеуметтік желі арқылы «байер» деген атаумен Қытай, Түркия, АҚШ-тан арзан тауар жеткізушілер көбейгенін айтады.
«Бірі елімізде тіркеліп, заңды жұмыс істесе, енді бірі толығымен халықты алдап кетуде. Солардың бірі елде лақап атымен танымал болған – Айс Мұратова. Шын аты - Арайлым. Ол соңғы 2 жылда халықтың сеніміне кіріп, сауда жасап өзін жақсы жағынан жарнамалаған. Оның ішінде, Қытайдан арзан тауарлар, ыдыс-аяқтар жіберемін деген. Әлеуметтік желі арқылы өзін ірі кәсіпкер ретінде көрсетіп, қол астымда заңды жұмысшыларым бар деп елді сендірген», – дейді депутат.
Белгілі болғанындай, басында аз-маз ақшаға қажетті тауарларды жіберіп, кейін ірі сомаға жеткенде барлық салымшыны бір күнде алдаған. Содан бері не тауар, не ақша қайтарылмаған деп жатыр.
Әлгі әйел еліміздің әр өңіріндегі 5 мыңнан астам азаматтан жалпы соммасы шамамен 30 миллиард теңге жинап алып, барлығын алдап кеткен.
Дәулет Мұқаевтың депутаттық сауалда: «Құрметті Берік Ноғайұлы! Бұл мәселе күннен-күнге ушығуда. Алданған отбасылардың жағдайы ауыр. Қаншама шаңырақ шайқалуға жақын. Бұл схема, таза қаржылық пирамидаға ұқсайды. Жоғарыда айтылғандарды ескере келе, тергеу жұмыстары әділ жүргізіліп, іске қатыстылардың барлығына тиісті жаза қолдану керек. Себебі алданған адамдар тергеудің әділетті өтетініне сенбей, жазадан құтылып кете ме деп қорқады. Сондықтан да бұл мәселені өзіңіздің жеке бақылауыңызға алуды сұраймын» деген жолдар бар.