Енді жұмыс орнында әйелге қол жүгірткен еркектер жауапкершілікке тартылуы мүмкін

Ведомствоаралық комиссия отырысында аталған мәселені депутат Асхат Аймағамбетов айта кетті.

«Әйелдер құқығы туралы айтсақ, жұмыс жағдайындағы харассмент үшін жауапкершілік енгізуді ұсынып отырмыз. Сондай-ақ, әйелдің денсаулығына бірнеше рет зиян келтіріп, бірнеше рет қол көтеру әрекеттерін ішінара криминалдандыру ұсынылуда. Мұндай норма да бар. Оның үстіне біз теңгерім сақтауға тырыстық. Криминалсыздандыру төңірегіндегі пікірталас әлі жүріп жатыр. Ұстанымдар өте көп. Кейбір профессорлар бір ұстанымда болса, Ішкі істер министрлігінің өз ұстанымы бар. Бірақ ол мәселенің шешімін таппай келе жатқаны анық. Біз жүйелі түрде немесе бірнеше рет әйел құқығын бұзғандардың әрекетін криминалдандыруды ұсынып отырмыз», - деді Асхат Аймағамбетов.

Заңнамаға ұсынылып отырған өзгерістердің қатарында үйбұзарларды отбасынан арнайы орталыққа оқшаулау шарасы да бар.

«Әдетте тұрмыстық кикілжіңнен кейін әйелді баласымен оқшаулайды. Ал күш көрсетуші үйде қалады. Алаңсыз өмір сүре береді. Әйел пана іздеуге мәжбүр. Сондықтан депутаттар күш көрсетушіні үйден оқшаулауды ұсынып отыр. Сонымен бірге оған тиісті жағдай жасалуы керек», - деді депутат.