RUS
SmartNews.kz сайтының хабарлауынша, ҚР Қаржы нарығын реттеу және дамыту агенттігі «KEGOC» АҚ-тың SPO-ға барлық қатысушыларын: инвесторларды, эмитентті, андеррайтерлерді, брокерлерді, сондай-ақ Қазақстан қор биржасын (KASE) және Astana International Exchange (AIX) осы жобаның табысты іске асырылуымен құттықтайды.
Инвесторлардың көпшілігі өздерінің өтінімдерін бағалы қағаздармен сауда-саттық көлемі бойынша ТМД биржалары арасында екінші орын алатын KASE алаңында орналастырғанын атап өткен жөн. Осы SPO шеңберінде KASE-ге 18,7 млрд теңге тартылды, бұл орналастырудың жалпы көлемінің 82,4%-ын құрайды.
KEGOС-тың KASE-дегі жай акцияларына жазылу барысында инвесторлардан жалпы сомасы 28,8 млрд теңгеге 37 445 өтінім келіп түсті. Оның ішінде 43,9% өтінімдерді 12,6 млрд теңге көлемінде жеке тұлғалар, 50,3% (14,4 млрд теңге) – сақтандыру ұйымдары, екінші деңгейдегі банктер және брокерлер атынан институционалдық инвесторлар және 5,8% (1,7 млрд теңге) заңды тұлғалар берді. KASE ұсынысына сұраныс 127%-ды құрады.
KEGOC-тың SPO өткізуі Қазақстанның отандық қор нарығын және тұтастай алғанда экономиканы дамыту үшін маңызды оқиға. Оның табысы барлық мүдделі тараптардың: шығаруды ұйымдастырған мемлекеттің, эмитенттің, компаниялардың үйлесімді жұмысының нәтижесі деуге болады.