"Ақшаң жоқ болса, кино түсірме": Қазыбек Құрайыш Дариға Бадықоваға жауап берді

Дариға Бадықова алғаш рет кино түсіріп, продюсерлік салада бағын сынап көрді.

“Жазбай-ақ қояйын деп едім, қоймадыңыздар. Алғашында бұл кісілерге ренжігенім рас. Мен ешкімнен ешқашан әндерімді қызғанған емеспін. Оны кино саласында жүргендердің бәрі білетін шығар. Әндерім барлық фильмдерге тегін кетеді. Жобамен онға жуық фильмде әндерімнен үзінді бар, біреуінен де ақша сұраған емеспін – бұл бір. Екіншісі – мен бұл кісілерге продюсер-спонсор болған үлкен апайымызға: "Мейлі, әнді ала беріңіздер, қарсы емеспін. Ақшаның да керегі жоқ" деп айтқанмын негізі. Енді неге қоспағанын және бағдарламаға келіп, неге осылай айтып отырғанын түсінбедім. Ал, жалпы, мен әндерімді ешкімге де беруге міндетті емеспін”, – дейді әнші.

Сондай-ақ ақшасы аз бола тұра кино түсіретін режиссерлерді де сынады. 

“Сосын тағы бір айтарым бар. "Мен өз ақшама кино түсіріп жатыр едім. Қаражатымыз жоқ, көмек беріңізші" дейтін болсаңыздар, кино түсірмей-ақ қойыңыздаршы. Мен музыканттарыма барып: "концерттерімді өзім жасап жатыр едім, маған тегін ойнап беріңдерші немесе жарықты тегін қойып, видеоны тегін түсіріп беріңдерші" деп айтқан емеспін. Ол дұрыс емес. Кейбір "доспыз-ау" деген кино түсіріп жүрген азаматтарға мен ұйықтамай отырып, арнайы авторлық әндер жазып беріп те жүрмін. "Рақметіміз бар" деп, жоқ болып кеткендердің атын айтпай-ақ қояйын. Не десеңдер де арым таза. Аман болыңыздар!", – деді Қазыбек Құрайыш.