RUS
Шығыс Қазақстан облысы Ұлан ауданында көміртегі тотығымен уланған екі бала ауруханаға жеткізілді. Жағдай туралы Kazinform басылымы жазды..
ШҚО Төтенше жағдайлар департаменті баспасөз қызметінің мәліметіне сүйенсек, оқиға 16 қараша күні Ұлан ауданы Восточное ауылында болған. Жеке тұрғын үйдегі пеш пайдалану ережесінің бұзылуы екі баланың улануына әкеліп соқты.
«Нақты айтқанда, жер үйдегі пеш мұржасы уақтылы тазаланбаған. 2009 және 2012 жылы туған екі бала шұғыл түрде Өскемендегі Ана мен бала орталығына жеткізілді. Биыл құтқарушылар профилактикалық рейд аясында осы отбасының үйінде болып, пешті қауіпсіз пайдалану бойынша нұсқаулықтар берген болатын. Алайда ата-анасы одан еш нәтиже шығармады», - делінген ақпаратта.
Департамент қызметкерлері облыс бойынша жылыту маусымы басталғалы бері жеке тұрғын үйлерге 83 мыңнан астам тексеру жүргізген.