RUS
SmartNews басылымының хабарлауынша, Қатар астанасы Дохада өтіп жатқан нысана көздеуден Әлем кубогінде отандасымыз Әсем Орынбай барлық қарсыласынан басым түсіп, алтыннан алқа тақты.
Ұлттық құрама спортшысы стенд атудың скит бағдарламасының финалында 51 ұпай жинап, тұғырдың ең биік сатысына көтерілді.
Сурет: Туризм және спорт министрлігі
Күміс жүлдені 50 ұпай алған италиялық мерген Кьяра Ди Марциантонио иеленсе, қола медаль Дания Джо Вицциге (АҚШ) бұйырды.
Тағы бір айта кетерлігі, дәл осы бағдарламада бақ сынаған 3 дүркін Олимпиада чемпионы Кимберли Роуд (АҚШ) жүлдеге бір табан жетпей тоқтады.
Туризм және спорт министрлігінің дерегінше, Халықаралық нысана көздеу федерациясы (ISSF) мұндай финалды араға 4 жыл салып ұйымдастырып отыр. Бәсекеде 42 елден келген 179 үздік мерген бақ сынап жатыр. Қазақ мергені қазір ISSF рейтингінде 7-орында келе жатыр.