RUS
Қазақстанда буын аурулары өршіп барады. Елде жыл сайын 15 мың адам буын алмастыру операциясын қажет етеді. Науқасқа шұғыл ем-дом жасауда жасанды интеллектінің көмегі зор. Бұған астаналық дәрігерлер көз жеткізді.
АҚШ-та жасалған робот 5 науқасқа эндопротездеу бойынша операцияны сәтті өткізді. 3D сканерлеудің арқасында робот имплантты мінсіз орнатты. Бұл адам ағзасында кейін ауырсыну мен асқынуларды болдырмайды дейді мамандар.
"Біз, хирургтар, өздеріміз жасайтын болсақ, бірнеше этаптан жасаймыз. Ал робот бір этаппен сол протезді қоюға көмектеседі. Ол дегеніміз, операцияның ұзақтығы да қысқарады. Және жарақат алуы да аз болады науқастың. Науқастың отадан кейін сауығуы тез болады", - деді Ұлттық ғылыми травматология және ортопедия орталығының дәрігері Асқар Бекназаров.
Дәрігерлердің айтуынша, буын аурулары алпысты алқымдағандар арасында белең алған. Шымкенттен келген Зәуре Байтееваға роботтың көмегімен ота жасалды. Қазір жағдайы жақсы, жүріп-тұруым әлдеқайда жеңілдеді дейді.
Дәрігерлер робот болашақта травматология саласында тұрақты қолданылатынына сенімді. Операция залында ол сенімді көмекші дейді. Ал бұл өз кезегінде буын функциясының бұзылуынан қиындық көрген науқастарға жедел көмек беруге үлкен мүмкіндік.