RUS
Smart News басылымының хабарлауынша, бұрынғы Бас прокурор, әрі экс-сенатор Қайрат Қожамжаров Экономикалық қылмысқа және сыбайлас жемқорлыққа қарсы күрес агенттігінің (ЭҚжСЖҚКА, қаржы полициясы) төрағасы лауазымын атқарған кезеңінде болған "Қорғас ісі" бойынша қарамағындағы бірқатар адамдар тергеуде отыр. Бұл туралы ҚазТАГ басылымы хабарлады.
"Бас прокуратура ҚР ЭҚжСЖҚКА арнаулы департаментінің бұрынғы бастығы Ұ.Мәдиевке (Ұлан – ҚазТАГ) және азаптау фактілері бойынша басқа да адамдарға қатысты қылмыстық істі тергеп жатыр", - дейді Бас прокуратура ҚазТАГ агенттігінің сұрауына жауап бере отырып.
Сондай-ақ, орган редакцияның Мәдиевтің ұсталуына қатысты ақпаратты растады.
"2023 жылдың 9 желтоқсанында Алматының ауданаралық мамандандырылған тергеу соты Ұ.Мәдиевке қатысты "қамап ұстау" түріндегі бұлтартпау шарасына санкция берді. Қазіргі уақытта болған оқиғаның барлық мән-жайын, сондай-ақ қатысы бар адамдарды анықтауға бағытталған тергеу әрекеттері жүргізілуде", - деп толықтырды Бас прокуратура сауалға жауап бере отырып.
Естеріңізге сала кетейік, Мәдиев пен Қожамжаровтың бұрынғы қарамағындағылар ұсталғаны туралы ҚазТАГ басылымы 11 желтоқсанда хабарлаған болатын. Бұрынғы сенатордың қарамағындағыларға жүктелген азаптау туралы ақпаратта, басқалармен қатар, "Қорғас ісіне" күдікті болған қыздарды зорлау туралы айтылады. Материалдарда финполдың бұрынғы жоғары лауазымды қызметкері Талғат Татубаевтың (Қожамжаровтың ең жақын "протеждерінің" бірі) және Қожамжаров мансап сатысы бойынша алға жылжытқан Алматы облысы бойынша финпол департаментінің бұрынғы басшысы Сергей Потаниннің есімдері көрсетілген. Бір қызығы, егер Мәдиев, Татубаев және Алматы бойынша ЭҚжСЖҚКА департаментінің бұрынғы бастығы Мақсат Дүйсенов "Қорғаста" контрабанданың пайда алушылары деп аталса, Қожамжаровтың өзі аталған қылмыстық схемалардың бас пайда алушысы деп аталады.