RUS
Smart News басылымының хабарлауынша, танымал файтер Шавкат Рахмонов UFC-дегі кезекті жеңісінен соң, арнайы ұйымдастырылған пресс-конференцияда өзіне қойылған бірқатар сұрақтарға жауап берді.
Журналистердің бірі Стивен Томпсонмен өткен жекпе-жекке қатысты сұрақтар қойды. "Мінсіз рекорд жасауыңмен құттықтаймын! Стивен Томпсонды жеңгендегі сезімің қандай?" деген сұраққа, Шавкат мынадай жауап берді:
"Әрине, өте қуаныштымын жеңіске жеткеніме. Бұл өте маңызды жеңіс деп ойлаймын. Мен үшін, менің командам үшін, елім үшін, Қазақстан үшін!" - деп жауап берді Шавкат.
Шавкат жекпе-жек қалай дайындалғаны туралы да айта кетті.
"Иә, бұл жекпе-жекке жақсылап дайындалдық. Жоспар бойынша қарсыласты кішкене бақылап, қимылдап, сезіп, тактика қолдануым керек болды. Ешқандай асығыстық болмады. Бірінші раундта жеңіске жетемін деп ойладым, екінші раундта партерге жығып, өзімнің жұмысымды жасадым. Ешқандай қобалжу болмады", - дейді файтер.
Сондай-ақ журналистердің бірі спортшыдан тілге қатысты сұрақтар қойған болатын. Журналистің "Әр жекпе-жек сайын сенің танымалдығың артып келеді. Бірақ тілдік кедергіден болар, сен біз үшін өте жұмбақсың. Жанкүйерлеріңе өзің жайлы не айтқың келеді?" деген сұрағына Шавкат қысқа жауап қайтарды:
"Мені тану үшін жекпе-жектерім жеткілікті деп ойлаймын. Ағылшынша тез үйреніп аламын деп те ойлаймын" - деді Шавкат.
Сондай-ақ пресс-конференциядағы қазақ тілді тілшінің "Ағылшынды жақсарту керек сияқты. Келесі жекпе-жекке дайынсың ба?" деген сұраққа, Шавкат нүкте қойды:
"Иә, мен дайынмын, әрине. Шынымды айтсам, басқа тілдерді үйрену, әрине, жақсы. Мен тек қана қазақша жақсылап сөйлесем болды. Басқа тілдерде сөйлей алмайтыным үшін ұялмаймын. Менің ана тілім - қазақ тілі. Өзге тілдерді білмеуім менің намысыма тимейді. Қазақша сөйлесем болды, басқасы бекер", - деді Шавкат Рахмонов.