RUS
Smart News басылымының хабарлауынша, режиссер Әсия Байғожинаның "Желтоқсан желі" фильмінің премьерасы 16 желтоқсан күні Хабар арнасында көрсетілуі керек болған. Бірақ белгісіз себептермен көрсетілмей қалған. Фильмді алып, орнына шетелдік көркем фильмді көрсеткен.
Жағдай туралы ақпаратты журналист Ардақ Бөкеева өзінің Facebook парақшасына жариялады.
"Кеше прайм-тайм уақытында Әсия Байғожинаның "Желтоқсан желі" фильмінің премьерасы "Хабар" арнасында көрсетілуі керек болған еді. Оның орнына голливудтық па, португалдық па, бір фильмді қойған. Прайм-таймға. Еліміздің туған күнінде. Басты мемлекеттік арнада", - деп жазды.
Журналист режиссер Әсия Байғожинамен байланысқа шығып, фильмнің көрсетілмеуінің себебін сұраған. Режиссер фильмді алып тастау туралы ешкім ескертпегенін айтқан.
Белгілі болғандай, фильмді түсіруге арнаның өзі тапсырыс берген. Фильмді түсіру үшін көптеген архивтерді қарап, оқиға куәгерлерінен сұхбат алынған.
Ал BES.media басылымы "Хабар" арнасының директоры Арман Сейітмамытқа байланысқа шыққанда, арна басшысы фильмнің көрсетілмеу себебін айтудан бас тартқан.
Еске сала кетсек, Әсия Байғожина - танымал деректі фильмдердің режиссері. Киногер бұған дейін 1991 жылы Желтоқсан оқиғасын сипаттайтын «Жарияланбаған демонстрация хроникасы» фильмін түсірді. Одан бөлек «Динмухамед Кунаев», «Хроники жизни и смерти», «Желание света», «Амен Хайдаров. Сказочные хроники», «В поисках веры» фильмдерінің режиссері.