RUS
Сыбайлас жемқорлыққа қарсы іс-қимыл агенттігінің Атырау облыстық департаменті басшысының бірінші орынбасары Нұрлан Жахиннің айтуынша, «Бизнеске жол» жобасы аясында 500-ге жуық кәсіпкермен кездесу өткізілген. Кәсіпкерлер тарапынан 81 өтініш түскен.
«Мемлекеттік аппараттың алдына азаматтардың әл-ауқатын жақсартуды қамтамасыз ету мақсаты қойылды. Сол себептен, агенттік тарапынан сыбайлас жемқорлық тәуекелдері картасы жасақталды. Қазір Атырау облысындағы проблемалық мәселелерге баса көңіл бөлініп, аталған картаға 9 мәселе енгізілді. Бұл – экология, олигополия, жол және инфрақұрылым, медицина, бизнесті қорғау, апатты және тозығы жеткен тұрғын үй, агроөнеркәсіптік кешен, жылу электр стансалар мен мерзімі ұзаққа созылған құрылыс нысандары», - деп хабарлады Нұрлан Жахин.
Оның айтуына қарағанда, департаменттің ұсынысынан кейін өңірге келген дәрігерлер саны 2 есеге өскен. Дәрігерлер үшін тұрғын үй жағдайы жақсартылған. Ал, олигополия саласында ірі кәсіпорындарға жұмысқа орналасу кезінде анықталған жемқорлық деректері жойылған.
«Департамент қызметкерлерінің ықпалымен жол және инфрақұрылым саласында 90 млн теңгеден астам залал қайтарылды. Заң бұзушылықтар жойылып, тиісті жұмыстар орындалды. Бизнесті қорғау мақсатында 900-ден астам кәсіпкердің құқығы қалпына келтірілді. Кәсіпкерлерге шамамен 1 млрд теңгенің берешек төлемдері өтелді», - деп мәлім етті Нұрлан Жахин.
Еске сала кетелік, бұдан бұрын Атырау облысында кәсіпкерлер қандай кедергіге жиі тап болғанын хабарлаған едік.