"Ағасының арқасы": Мұхамедали Жүгінісов Қазақстан дауысын жеңуіне ағалары көмектесе ме?

Smart News басылымының хабарлауынша, «Қазақстан дауысы» байқауының қатысушысы Мұхамедали Жүгінісов жобадан кететінін мәлімдеді. 

«Осы жоба басталғалы менің атыма айтылып жатқан сын өте көп. Олар тіпті еш қатысы, жазығы жоқ отбасыма тіл тигізіп жатыр. Сондықтан жобаны осы жерден тоқтатуды жөн көрдім» деді тікелей эфирде Мұхамедали Жүгінісов.

Күтпеген жаңалықты тәлімгерлер тосырқай қабылдады. Бәрі бір ауыздан Мұхамедалиге қарсылық білдірді.

«Мен сенің тәлімгерің ретінде бұған жол бере алмаймын. Сені жеңіске жетеді деп үміттеніп, осы уақытқа дейін жетелеп, басқа қатысушылардың жолын кесіп, өзіңді жартылай финалға дейін әкелгенде, мынау айтқаның дұрыс емес» деді тәлімгері Жанар Дұғалова.

Кезінде жас әншінің тұсауын кескен композитор Төлеген Мұхамеджанов та үміткерге қолдау білдірді.

«Айналайын, Мұхамедали, тұсауыңды кескен адам ретінде мені сыйласаң, бұл жобада қалуың керек. Арғы жағын халық шешеді. Жалпы, Мұхамедалидің өнерлі отбасында туылғанына, ағаларының атақты әнші болғанына оның түк кінәсі жоқ. Бұл баланың да өз бағын сынап, өз жолын табуына қақысы бар» деді композитор.

Айта кетейік, жартылай финалға дейін қарсыластарын шаң қаптырып келе жатқан Мұхамедали Жүгінісовке әлеуметтік желі қолданушылары «Ағаларының арқасында жеңіп келе жатыр», «Бұрыннан танылып қойған әншіні қатыстырмай, басқа адамдарға жол беруі керек еді» дегендей пікір жазған болатын.

Сонымен, тәлімгерлердің талабымен жобада қалған Мұхамедали Жүгінісов финалға жолдама алды. Алдағы аптада, «Қазақстан дауысы» жобасының финалында Нарқыз Жанұзақ, Азамат Төрехан, Мұса Марат және Мұхамедали Жүгінісов бақ сынайтын болады.