RUS
Жас ғалымға бұл мүмкіндік «Болашақ» халықаралық стипендиясы арқылы беріліп отыр.
Ақбілек Пазылханқызы мектептерде қазақ тілі мен әдебеиеті пәнін оқушыларға жеңілдетілген әдіспен үйрету жобасымен айналысуда. Бұл жоба Ғылым және жоғары білім министрлігі жариялаған гранттық қаржыландыру конкурсында жеңімпаз деп танылып, 14 миллион теңге ұтып алған. Нәтижесінде ол жалпы білім беретін мектептердің 10-11-сынып оқушыларына арналған электронды оқулықтар мен оқу-әдістемелік кешендерін жасады. Жас ғалымның әдістемесі лингвистика мен мәтінді талдауға негізделген. Оқыту мен ғылымды шебер ұштастырған маман «ЖОО үздік оқытушысы» атанып, көп ұзамай Түркияның Гази университетінде тағылымдамадан өткен. Енді міне, үздіксіз ізденістің нәтижесінде АҚШ-қа ғылым көкжиегі ашылып отыр.
Айта кетелік, Өзбекәлі Жәнібеков атындағы ОҚПУ-де «Ғылыми тағылымдамалар» санаты бойынша барлығы 11 ғалым «Болашақ» халықаралық стипендиясының иегері атанды.
Мемлекеттік кеңесшінің төрағалығымен шетелде кадрлар даярлау жөніндегі республикалық комиссияның 2023 жылғы 20 желтоқсандағы шешімінің қорытындысы бойынша профессор-оқытушылар енді әлемнің жетекші ғылыми орталықтарында ғылыми тағылымдамадан өтеді. Стипендиаттар жаратылыстану ғылымдары, гуманитарлық сала, әлеуметтік ғылымдар, білім бағыттары бойынша зерттеу жүргізіп, тәжірибе алмасып, білімдерін жетілдірмек.