RUS
Бағдарламаның жүзеге асырылу кезеңінде ұйымға 257 өтінім келіп түсті, оның ішінен 102 келешегі бар жоба іріктелді.
Қарқынды оқыту барысында стартап-командалар технологиялық кәсіпкерліктің әртүрлі аспектілері бойынша курсқа, сондай-ақ воркшоптарға қатысып, ұжымдық және жеке тәлімгерліктен өтті. Соңғы Demo Day кезеңінде 42 жоба инвесторларға өз идеяларын ұсынды.
Енді бағдарламаның әрбір қатысушысының өз стартапы үшін гранттық қаржыландыруды тартуға, сондай-ақ жобаны одан әрі ілгерілетуге қолдау алуға мүмкіндігі бар. Бұл жетістік Kyzylorda Hub-тың аймақтағы инновациялық идеяларды ынталандырудағы және кәсіпкерлікті дамытудағы айрықша рөлін көрсетеді.
Инкубациялық бағдарламаны сәтті аяқтаумен қатар, Kyzylorda Hub командасы тамыз айында Сеул технологиялық университетінің делегациясымен кездесті. Кездесу барысында Қызылорда қаласындағы Жасанды интеллект мектебінің жанындағы бизнес-инкубациялау орталығы аясындағы ынтымақтастық перспективалары талқыланды.
Сеул Тех делегациясы Kyzylorda Hub-ты қолдауға қызығушылық танытып, Қорқыт Ата атындағы Қызылорда университетінің жанындағы Kyzylorda Hub жаңа коворкингін техникалық жарақтандыруға демеушілік көмек көрсетуге дайын екенін білдірді. Бұл қадам өңірдегі инновациялық жобалар мен стартаптарды дамытуға қосымша мүмкіндіктер береді.