RUS
SmartNews басылымының хабарлауынша, Марғұлан университетінде Альберт-Людвига атындағы Фрайбург (Германия) университетінің ғалымдары сыйға тартқан бірегей ғылыми-зерттеу құрылғысы таныстырылды.
Тұсаукесер шарасына басқарма төрағасы-ректордың м.а. Жанбол Жилбаев қатысып, шетелдік ғалымдарға бірлескен ынтымақтастық жұмыстары үшін алғыс білдірді.
Соңғы үш жылда екі университеттің ғалымдары «Қазақстандағы жаһандық климаттық өзгерістердің салдарын зерттеуге үлес ретінде қазіргі заманғы экофизиологиялық өлшеу әдістерін енгізу» халықаралық жобасын жүзеге асыруға қатысқан болатын. Жоба жетекшілері – Фрайбург университетінің профессоры, биология ғылымдарының докторы Маркус Хаук (Prof. Dr. Markus Hauck, индекс Хирша-38) және биология ғылымдарының докторы, профессор Чоймаа Дуламсурен (Dr. Choimaa Dulamsuren, индекс Хирша-36). Университет ғалымдарына тарту етілген қос құрылғының құны шамамен 20 миллион теңге тұрады. Германиялық ғалымдар бірегей құрылғыны Марғұлан университетіне табыстау үшін Павлоларға арнайы келді.
Жаңа технологияның жабдықтар жиынтығында атмосфералық параметрлерді бақылауға арналған ғылыми-зерттеу метеорологиялық станциясы және Scholander деп аталатын өсімдіктердің су потенциалын өлшейтін камерасы бар.
Алынған құрал-жабдықтар алдағы уақытта ҚР Ғылым және жоғары білім министрлігінің гранттық қаржыландыруымен жүзеге асырылып жатқан «Баянауыл ұлттық паркі өсімдіктерінің климаттық және антропогендік факторлардың әсерін, қазіргі жағдайы мен динамикасын бағалау» жобасын жүзеге асыру үшін пайдаланылатын болады. Бұл жоба 2023 жылы Марғұлан университеті жанындағы биоценология және экологиялық зерттеулер орталығының базасында жүзеге асырыла бастады.
Фрайбург университетінің ғалымдары басқарма төрағасы – ректордың міндетін атқарушы Жанбол Жылбаевпен бірге ғылыми ынтымақтастықтың алдағы перспективаларын талқылады. Сондай-ақ, университеттер арасында меморандумға қол қою, бірлескен ғылыми жобаны жүзеге асыру, Германия университетінің қолданбалы экология және өсімдік шаруашылығы кафедрасы базасында Марғұлан университеті қызметкерлерінің тағылымдамадан өтуін ұйымдастыру жоспарлануда.