RUS
Қаржы министрлігінің Ұлттық қорды бюджеттік несиелендіру және қаржы секторы мәселелері жөніндегі өзара іс-қимыл департаментінің директоры Айбол Арғынғазинов Ұлттық қордан балаларға ақша аударуға қатысты заңнамалық өзгерістер күшіне енгенін айтты.
"Бұл 7 миллионнан астам жас қазақстандыққа алғашқы төлемдерін алуға мүмкіндік береді. 2024 жылы 300 мыңнан астам бала Ұлттық қордың қаражатын оқу ақысын төлеуге және тұрмыс жағдайын жақсартуға пайдалана алады", - деді Арынғазинов.
Бірыңғай жинақтаушы зейнетақы қоры (БЖЗҚ) активтер мен талаптарды, жинақ шоттарындағы мақсатты жинақтарды есепке алу және төлемдерді жүзеге асыру операторы болып белгіленді.
Барлық балалар – 2006 жылы туған және одан кейінгі Қазақстан азаматтары жыл сайын ҚР Ұлттық қорының инвестициялық кірісінің 50 пайызын алатын болады. Барлық балалар есепті жыл үшін бірдей соманы алады.
Өткен жылдарда балаларға есептелген сомалар Ұлттық қор активтерінің бір бөлігі ретінде инвестициялауды жалғастырады. Нәтижесінде оларға инвестициялық кіріс қосымша есептелетін болады.
Балалар 18 жасқа толғанға дейін мақсатты талаптар мерзімінен бұрын бас тарту құқығынсыз қалыптасады. Балалар 18 жасқа толған жылы нысаналы талаптар мақсатты жинақ шотына аударылады және 18 жасқа толғаннан кейін ересектер жинақтарды екі мақсатқа – тұрғын үй жағдайын жақсарту және оқу ақысын төлеуге пайдалану құқығына ие болады. Төлемдерге жеке табыс салығы салынбайды.
2024 жылы 18 жасқа толған балаларды қоса алғанда, шамамен 695,5 миллион доллар қаражат берілетіні белгілі болды. 695,5 миллион долларды 7 миллион балаға бөлгенде, әр балаға 99,3 доллардан болған. Алайда Қазақстанда 7 миллионнан да астам бала болуы мүмкін болғандықтан, бұл сома азаюы мүмкін.