RUS
Smart News басылымының хабарлауынша, «Шетелдегі қазақ балалары» бағдарламасында Юта штатында тұратын қазақ балаларының өмірі туралы түсірілім жалғасып жатыр. Бағдарламаның кезекті санында америкалық отбасы асырап алған Сардар Пол өзінің ата-анасын іздейтінін айтты.
Белгілі болғандай Сардардың туу туралы куәлігінде ата-анасының есімі жазылған. Есімі жазылғанмен, Сардарға өмір сыйлаған әйелдің қайда екені белгісіз. Әзірге оны табу мүмкін болмай жатыр.
Туған анасы туралы Сардар Пол былай деп сыр шертті:
«Туған анамның есімі Баймаханова Эльмира Қалмахамбетқызы. Әкем – Бекнұр Баймахан. Америкалық ата-анамның айтуынша, туған анам мені перзентханада босана салысымен қалдырып кеткен екен. Шынымды айтсам, қалай болғанын толық білмеймін. Туған анамды табамын деп ойлаймын. Бұл – менің өмірімдегі ең керемет, ұмытылмас оқиға болар еді деп үміттенемін. Дегенмен бұлай болмауы да мүмкін екенін білемін. Бірақ үмітімді үзбеймін. Іздей беремін.
Мен оны жек көрмеймін. Мүмкін ол сол кезде қатты қиналған шығар. Басына түскен ауыртпалықты көтере алмаған болар. Оны айыптамаймын. Жазғырмаймын. Мен тек қана оны көргім келеді. Мама, егер осы бағдарламаны көріп отырсаң, сені іздеп жүргенімді білші. Күндердің күнінде бір өзіңмен кездесемін деп үміттенемін. Сенімен жақынырақ танысқым келеді. Өмір бойы өзімді мазалаған сұрақтардың жауабын алғым келеді», - деді Сардар Пол бағдарламаға берген сұхбатында.