RUS
SMARTNEWS басылымының хабарлауынша, жемқорлыққа қатысты заңды түзету талқыланды.
Мәжіліс жанындағы Қоғамдық палатаның мүшелері депутаттармен және сарапшылармен Сыбайлас жемқорлыққа қарсы іс-қимыл мәселелері туралы заң жобасы мен оған ілеспе түзетулерді талқылады.
Мәжілістің вице-спикері Дания Еспаеваның қатысуымен өткен жиынға Қоғамдық палата төрағасы Айдос Сарым жетекшілік етті.
Отырысқа қатысушыларды заң жобаларының нормаларымен Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов таныстырды.
Оның айтуынша, түзетулер арқылы Сыбайлас жемқорлыққа қарсы саясат тұжырымдамасы ішінара жүзеге асырылады. Негізгі заң жобасы алты бағытты қамтиды. Олардың қатарында жемқорлардың жария реестрін енгізу, пара алуға келісім беру, пара сұрау немесе талап ету, пара ұсыну немесе пара беруге уәде еткені үшін қылмыстық жауапкершілік және т.б. бар. Жалпы үш кодекс пен бес заңға өзгерістер мен толықтырулар, Әкімшілік құқық бұзушылық туралы кодекске ілеспе түзетулер енгізіледі.