RUS
SMARTNEWS басылымының хабарлауынша, Қазақстанның тумасы, «Wanted», «Abraham Lincoln, Vampire Hunter», «Unfriended: Dark Web» секілді хәлливудтық фильмдердің режиссері Тимур Бекмамбетов жаңа жобасына кірісті.
Көктемде режиссер «Mercy» атты ғылыми-фантастикалық триллер фильмнің түсіріліміне кіріспек. Бұл туралы Deadline басылымы жазды.
Жаңа туындының продюсері жақында ғана «Оскар» жүлдесінде «Оппенхаймер» фильмі үшін екінші номинациясына іліккен Чарльз Роуен болса, фильмнің режиссері Тимур Бекмамбетовтің өзі болмақ. Ал басты рөлдердің бірін танымал актер, «Галактика сақшылары» блокбастерінде ойнаған Крис Пратт сомдайды.
Айта кетсек, Крис Пратт бұрынырақта Тимур Бекмамбетовтің «Wanted» кинокомиксінде ойнаған еді. Бұл фильм Тимур Бекмамбетов үшін оның хәлливудтағы дебюті болған.