Maqsut Narikbayev University журналистика мектебінің студенттері Tengrinews стипендиясының иегерлері атанды

Аталған стипендияның мақсаты – Қазақстандағы жоғары оқу орындарының журналистика мамандығы бойынша білім алып жүрген студенттердің оқу, ғылыми және шығармашылық қабілетін қолдау.

Бүгін салтанатты шарада MNU Халықаралық журналистика мектебінің үш студенті -  Қапбаева Анела, Алшоразова Диана және Тұрарбек Жайнаға Tengrinews.kz стипендиясы табысталды.  Стипендия иегерлерінің барлығы «Журналистика: аналитика және тергеу» мамандығы бойынша 2-курста оқиды.

Maqsut Narikbayev University Басқарма Төрағасы Талғат Мақсұтұлы Халықаралық журналистика мектебінің студенттері жаңа заманауи әдіс бойынша білім алып жатқанын атап өтті.

 «Біз студенттерге жаңа әдістерді үйрете отырып, кәсіби журналистерді қалыптастыруға ұмтыламыз. Оқу материалының 70%-ы ағылшын тілінде, ал қалған 30%-ы мемлекеттік және орыс тілдерінде оқытылады. Бұл студенттерге бастапқы дереккөздерді пайдалануға және әлемдік ақпараттарды зерттеуге мүмкіндік береді. Оқытудың көп бөлігі әлемнің жетекші университеттерінде оқыған, тәжірибесі бар оқытушылармен, ағылшын тілінде жүргізіледі», - деді ол.

Аталған шараға Tengrinews Бас редакторы Айсұлтан Кұлшыманов қатысты. Ол құттықтау сөзінде журналистиканың үлкен күшке ие екенін атап өтті.

«Сіздерге қарап, мен студенттік жылдарымды есіме түсіремін. Сіздер дұрыс мамандықты таңдадыңыздар. Мен университетті бітіргеніме шамамен он жыл болды, алғашқы күндері мен қайда және қалай жұмыс істейтінімді білмедім, елестете алмадым. Сосын журналистикада бір жыл жұмыс істегеннен кейін, оның қаншалықты керемет және маңызды мамандық екенін, оның өмірдің барлық салаларына қаншалықты әсер ететінін түсіндім. Компьютерде, планшетте және ноутбуктежазған мақалаларыңыз, түсірген суреттеріңіз және видеоларыңыз бұл үлкен күшке ие. Қазіргі уақытта журналистика тоқырауда, бұл салада жаңа көзқарас қажет», - деді Айсұлтан Кұлшыманов.

Еске сала кетейік, өткен жылдың қыркүйек айында халықаралық журналистика мектебі ҚР Президентінің Телерадиокешенінің қолдауымен ашылған.

Стипендия иегерлерін лайықты жетістіктерімен құттықтаймыз және журналистика саласында табыс тілейміз!