Ақтөбе жұрты жол жөндету үшін Димаш Құдайбергенді үйлеріне тіркеп қоймақ

SMARTNEWS басылымының хабарлауынша, Ақтөбеліктер әлемге танымал әнші Димаш Құдайбергеновке үндеу жасады. Бұл туралы Orda.kz ақпарат агенттігі жазды.

Айтуларынша, атақты халық әртісінің бала кезінде тұрған көшесіне әлі күнге дейін асфальт төселмеген. Бүгінде қаладағы халық көп шоғырланған аудандағы көшенің жолдары жүруге жарамсыз.

“Бұл – ескі теміржол ауданы. Бұрынғы Деповская көшесі. Қазіргі Жаманқұлов-Черепанов қиылысында орналасқан. Қаланың қақ ортасында созылып жатқан ұзын көше. Қала билігі әлі күнге дейін құр уәде беріп келе жатыр. Ал Димаштың ата-анасының үйі орналасқан Черепанов көшесі көпқабатты үйлерден екі жүз метрге жетпей, жақында асфальтталды. Жеке үй аймағына ғана тас жол төселді, қалған жерлерге жетпей қалған көрінеді-мыс. Тіпті екі жағына жаяу жүргіншілер жолын да салған. Біз атақты жерлесімізден көмек сұраймыз. Тіпті Димашты пәтерімізге тіркеуге де дайынбыз. Уақытша болса да. Қазақтың дәстүрінде бар ғой, көмек қолын созу”, – дейді қала тұрғыны Ольга Климонова.

Әзірге көшені қар басқанымен, көктемде жол батпаққа айналатын көрінеді. “Бұл – көп жылдан бері түйіні шешілмей келе жатқан мәселе”, – дейді қала тұрғындары.