RUS
Биылғы көктемгі семестрге «Welcome to ENU» академиялық ұтқырлық бағдарламасы бойынша әлемнің 31 оқу орнынан студенттер оқуға келді. Оның ішінде Бельгия, Франция, Венгрия, Польша, Қытай, Оңтүстік Корея, Тайланд, Вьетнам, Үндістан, АҚШ, ТМД елдері бар. Шетелдік жастар үшін оқу 13 факультетте қазақ, орыс және ағылшын тілдерінде тегін жүргізіледі.
Тесс Линель елімізге Бельгиядан келді. Ол Universite de Mons университетінде магистратурада оқиды және академиялық ұтқырлық бойынша Еуразия ұлттық университетіне келуді ұйғарған. Тесс биыл ЕҰУ-да оқуын тағы бір семестрге ұзартты.
«Тіл деңгейін көтеру мақсатында ЕҰУ-ға оқуға келдім. Франция мен Бельгияда оқып жүрген кезімде Орталық Азия елдеріне қызығушылық танытып, көптен бері Қазақстанға барғым келетін. ЕҰУ өзім оқитын Universite de Mons оқу ордасымен серіктестік орнатқанын білген бойда осында тағылымдамадан өтуге бел будым. Сонымен қатар, маған бұл жерде үлкен сенім артылып, сабақ өткізуге мүмкіндік берілді. Қазір мен ЕҰУ-да ауызша аударма бойынша практикалық дәрістер өткіземін және француз тілін үйретемін», - деп түсіндірді Тесс Линел.
Атап өткен жөн, шетел университеттерінің білім алушыларына арналған «Welcome to ENU» академиялық ұтқырлық бағдарламасы 2020 жылы іске қосылған. Оның аясында 4 жыл ішінде Қытай, Оңтүстік Корея, Түркия, Германия, Франция, Бельгия, Үндістан, Польша, Словакия, Литва, Жапония және т.б. елдерден 800-ге жуық шетелдік студент ЕҰУ білім алды.