RUS
«Былтыр Алматыда екі жасар бала күмәнді бір клиникада емделіп жатып көз жұмды. Балаға бір мезгілде 22 препарат, 7 рет көк тамырға дәрі жіберіп, ем-дом жасаған. Осының салдарынан ағза уланып, баланың бүкіл өмірлік маңызды мүшелеріне зақым келіп, жеткіншек қалалық балалар ауруханасының жансақтау бөлімінде көз жұмды. Бұл клиникада кішкентай науқастарға бір мезгілде 40-қа дейін дәрі-дәрмек жазылады және балалардың денсаулығына орны толмас зиян келтіретін асқынулар жиі кездеседі. Бұл ретте дәрігердің кеңесі — 200 мың теңге, массаж курсы — 400 мың теңге, ал басқа да медициналық қызметтердің бағасы негізсіз жоғары», — деді Г. Нұрымова Үкімет басшысының орынбасары Тамара Дүйсенованың атына жолдаған сауалында.
Бұл ретте ол медициналық жоғары оқу орындарында болашақ дәрігерлерге 5 түрлі препараттан артық бермеуге үйрететінін айтты.
«Сондай-ақ жақында медициналық білімі жоқ, косметология және пластикалық хирургия саласындағы сертификаты, мемлекеттік лицензиясы жоқ жалған дәрігердің заңсыз пластикалық операциясынан кейін Астананың №2 қалалық ауруханасының жансақтау бөліміне ауыр жағдайдағы науқас жатқызылды. Науқасты шұғыл ота жасау арқылы әрең аман алып қалды. Ал мұндай фактілер өте көп», — деді депутат.
Оның айтуынша, әлеуметтік желілерде медицина саласында арнайы білімі жоқ кез келген адам өзін сала маманы, тіпті дәрігер ретінде жариялай алады.
Адамдар осындай жарнаманың құрбанына айналады.
«Жоғарыда айтылғандарға байланысты тиісті ұсыныстарды жарияламақпын. Біріншіден, әлеуметтік желілерде медициналық қызмет көрсетуге қатысты жарнамаларды бақылау керек. Екіншіден, заңсыз медициналық қызметті анықтау бойынша жұмысты күшейту маңызды», — деді Гүлдара Нұрымова.