RUS
SMARTNEWS басылымының хабарлауынша, Қазақстанның еңбек сіңірген спорт шебері, Құрмет орденінің иегері, Олимпиада ойындарының екі дүркін күміс жүлдегері Әділбек Ниязымбетов қазақ боксшылары Париж Олимпиадасында жүлдеге таласуға толық мүмкіндігі барын айтты. Бұл туралы ол Kazinform халықаралық агенттігіне берген сұхбатында айтты.
Спортшы "шаршы алаңнан кетсем де, спорт әлемінен кеткен жоқпын. Қазіргі таңда мен Ақтау қаласындағы облыстық олимпиадалық даярлау орталығында бокс мектебінің директорымын. Өзім айналысқан спорт түрінен жастарға тәлім-тәрбие беріп, тәжірибеммен бөлісіп жүрмін" дейді.
Биылғы жазғы Париж олимпиадасында боксшы кімдердің жеңісіне сенетінін айтты.
– Қазіргі таңда Мырзағали Айтжанов баптайтын Қазақстан ұлттық құрамасында кіл мықтф боксшылар жиналған. Олардың арасынан мен ешкімді бөле-жарғым келмейді. Барлығының да жүлдеге таласуға мүмкіндігі бар. Мен тек, барлығына сәттілік тілеймін. Бізде қазір Қамшыбек Қоңқабаевтан басқасы әлі жолдама алып үлгерген жоқ. Алда екі іріктеу турнирі тұр. Мен сол жарыстардан ұлттық құрма Парижге толық құрамда жолдаманы жеңіп алады деп сенемін, - дейді ол.
Сондай-ақ тілшінің "Өзіңіз бір емес, екі Олимпиада ойындарына қатысып, екі мәрте күміс жүлдегер атандыңыз. «Әттең-ай» деген кезіңіз болды ма?" деген сауалына спортшы былайша жауап қайтарды:
– Иә, мен екі рет Олимпиадаға бардым. Екеуінен де жүлдесіз қайтқам жоқ. Тек, алтын ала алмай кеткенім болмаса, басқа өкінішім жоқ. Шамам келгенше ел үміті үшін барын салдым. Қолымнан келгенді жасадым. Жанкүйерлерімнің көңілін жабырқатқан жоқпын деп ойлаймын. Мен алмаған алтынды алдағы Олимпиадада қазіргі боксшыларымыз алса екен деген тілегім бар, - деді спортшы.