RUS
SMARTNEWS басылымының хабарлауынша, Ресейлік БАҚ-та бүгін ғана Алексей Навальныйдың қайтыс болғаны белгілі болды.
Оппозиционер Алексей Навальныйдың өліміне қатысты Украина президенті Владимир Зеленский пікір білдірді.
«Алексей Навальный Ресей түрмесінде қайтыс болғаны белгілі болды. Әлбетте, оны Путин өлтірді. Оның кесірінен азапталып құрбан болған басқа да мыңдаған жандар секілді көз жұмды. Путинге кім өлетіні маңызды емес, тек ол өз позициясын сақтап қалса болғаны. Сол үшін Путин уысындағының бәрін жоғалтуы керек, бәрінен айырылып, істегені үшін жауап беруі керек», — деді Украина президенті.
Еске сала кетсек, ресейлік оппозиция өкілі Алексей Навальный колонияда өмірден өтті. Навальный жазасын өтеп жатқан Ямало-Ненецк автономиялық округі бойынша Федералдық қылмыстық атқару қызметінің департаментінің хабарлауынша, Навальный колонияда қаны ұйып көз жұмған.
«Сотталған Навальный А.А. серуендегеннен кейін бірден есінен танып, өзін нашар сезінді.
Мекеменің медицина қызметкерлері дереу келіп, жедел медициналық жәрдем бригадасы шақырылды.
Барлық қажетті реанимациялық іс-шаралар өткізілді, олар оң нәтиже бермеді. Жедел медициналық көмек дәрігерлері сотталушының қайтыс болғанын айтты», - делінген хабарламада.
Саясаткердің өліміне қатысты басқа да мән-жайлар анықталып жатыр.