RUS
SMARTNEWS басылымының хабарлауынша, Қарқаралыдағы үйден шыққан өртке байланысты жағдайдың жай-жапсары белгілі болды. Ол туралы омбудсмен Динара Зәкиева айтты.
Бала құқықтары жөніндегі уәкілдің айтуынша, балалардың үлкені бес жаста, кішісі 1,5 жаста.
"Аналары мектепте мұғалім, әкелері құрылыста жұмыс істейді (қыста ол үй шаруашылығымен айналысты). Қайғылы оқиға 23 ақпанда орын алды. Облыс әкімінің орынбасары, төтенше жағдайлар қызметі, уәкілетті органдар оқиға орнында. Қайғыра көңіл айтамын", - деп жазды Зәкиева.
Қайғылы оқиғаға қатысты Қарағанды облысының төтенше жағдайлар департаменті де түсініктеме берді.
"23 ақпанда Қарқаралы ауданы Талды ауылында екі пәтерлі бір қабатты тұрғын үйде 10 шаршы метр аумақта тұрмыстық заттар, жиһаздар, терезе және есік блоктары өртенді. Өрт салдарынан 2019, 2020, 2021 және 2022 жылы туған төрт бала қаза болды. Өрт кезінде балалар үйде жалғыз болған. Ата-анасы үйде болмаған. Зардап шеккен отбасына жергілікті атқарушы органдар мен тұрғындар тарапынан барлық қажетті көмек көрсетілуде”, – делінген хабарламада.
Өртке қатысты қылмыстық іс қозғалып, тергеу амалдары жүргізіліп, сараптамалар тағайындалды. Оқиғаның себептері мен мән-жайы анықталуда.