RUS
SMARTNEWS.KZ басылымының хабарлауынша, танымал әнші Жазира Байырбекова өзінің балалық шағын еске ала отырып, өзінің балалары туралы сөз қозғады.
«Қыста мектепке киетін аяқ киімдерімізді ошақтың айналасына кептіріп қоятынбыз. Түнде әжетқанаға бару үшін үлкендердің біреуін оятатын едік. Ошақтың сықырлап жанып тұрғаны сығырайып, плиталардың арасынан жарық беріп тұратын. Иттер үрсе кім жүр екен деп терезеден қарайтынбыз. Бәріміз қатарымыздан тізіліп ұйықтайтынбыз. Үйдегі ең кішкентайдың қасына жатуға таласатынбыз. Әкеміз біз ұйықтап жатқанда жұмысқа кететін. Біз ұйықтар алдында келетін. Сирек көрген соң ұялатынбыз әкемізден.
Жексенбі күні бізді масақ теруге немесе қалаға концерт көруге, әйтеуір бір жаққа апаратын. Әкемнің қабағын баққан анама әкем үнемі тосын сый жасап жүретін. Екеуінің махаббатындай жұпты мен әлі кездестірмедім. Жазда көршінің бағындағы біздің аулаға түскен алмасы дәмдірек көрінетін.
Көшеден көлік өткенде жүгіріп барып шаңын иіскеген ұнайтын маған. Қарлығаштың ұясын бұзып,балапандарының аяғына жіп байлап ұшуды үйретем деп өлтіріп алғам.Оны бір жерге көміп Х осындай қойып кеткем ағаштан. Ауылдың сыртына барып өліп жатқан итті түлкі,терісін алып өткіземіз деп сүйреп алып келгенбіз. Күзде тығылмашақ ойнап жүріп қалың сары жапырақтардың арасына ұйықтап қалып әрең табылғандарымыз бар.
Нағашы әжем Алматыда тұратын. Үнемі сары май, кәмпиттер посылкамен салатын. Сары майды нанға жағып, бетіне құмшекер сеуіп жейтінбіз» – деді әнші.
Сондай-ақ әнші тұңғыш ұлы Қазбектің жетістіктерін сөз етіп, ұлының арқасында шетелде қыдырып жүргенін айтты.
«Әр заман әр түрлі.
Біздің балалардың да өз естеліктері болады. Біз мұндай болғанбыз, сендер де сондай болуларың керек деу қате деп ойлаймын.
Тұңғышымыз Қазекем Аллаға шүкір кәсіптерін жасап бізге ел жер аралатып жүр. «Болашақта балаларыма көп байлық жинап, оларды жетістікке жету бақытынан айырғым келмейді» деді Қазекем. «Олар өз еңбекпен жеткенде бақытты болады» дейді.
Ойланып қарасам Қазекем өз еңбегімен тапқан табысына ел аралап жүргені, бізді де аралатып жүргені көңіл толтырады. Аллаға сансыз шүкір» – деді әнші.