RUS
SMARTNEWS.KZ басылымының хабарлауынша, әдеттегідей мұсылман қауымы 30 күн ораза ұстайды . Сәуір айының 5-нен 6-на қараған түн – қасиетті Қадір түні. 10 сәуір – Ораза айт мерекесі.
Қазақстан мұсылмандары діни басқармасының хабарлауынша, пітір садақасы еліміз бойынша екі келі ұнның орташа бағасы негізінде 640 теңге болып бекітілді.
«Қазақстан мұсылмандары діни басқармасының Шариғат және пәтуа бөлімі Түркия, Әзірбайжан, Өзбекстан, Қырғызстан, т.б. елдердің Ғұламалар кеңесімен, пәтуа саласына жауапты ғалымдармен ақылдаса келе, биылғы Рамазан айының басталатын күні бекітілді» делінген ҚМДБ хабарламасында.
Ал ұнның бағасы ҚМДБ-ның қала және облыс өкілдіктері берген мәлімет негізінде анықталған. Пітір садақасын құрма, мейіз бағасымен де беруге болады.
Ораза ниеті: Алла Тағаланың разылығы үшін таң атқаннан күн батқанға дейін Рамазан айының оразасын ұстауға ниет еттім. Ауызашар дұғасы: Уа, Жаратқан Ием! Сенің разылығың үшін ораза ұстадым, Саған иман келтірдім, Саған тәуекел еттім, Сен берген ризықпен ауыз аштым. Уа, кешірімді Алла! Менің алдыңғы және соңғы күнә-кемшіліктерімді кешір!
Өзіңізге қажетті облыс, қала, аудан және ауылдың, яғни еліміздің барлық 6000 елді мекені қамтылған ораза және намаз кестесін muftyat.kz сайтынан жүктеп алуға болады.