RUS
SMARTNEWS.KZ басылымының хабарлауынша, танымал коуч, бизнесуомен Роза Әшірбаеваның «Kozqaras» подкасында отбасылық психолог Ержан Мырзабаев тұрмыстық өмірдегі проблемалар туралы сөз етті.
Подкаста отбасылық мәселелер мен оларды шешу жолы талқыланды. Психолог Ержан Мырзабаев отбасылық проблеманы шешуге әдетте бірінші әйелдер тырысатынын айта кетті. Подкаст жүргізушісі Роза Әшірбаева да отбасылық өмірдегі мәселелерді алғаш боп байқайтын, оны шешуге тырысатын әйелдер екенін айта келіп, еркектер «бәрі жақсы» деп жүріп, ажырасқан соң барып бәрін түсінетінін, қайта қосылғысы келетінін айта кетті.
Мұндай екіжақтылыққа қатысты отбасылық психолог былай деп түсініктеме берді:
«Әйелдерде интуиция өте мықты жұмыс істейді. Сондықтан әйел алдын-ала істің нәтижесін көріп, проблеманың қайда бара жатқанын сезіп жатады. Сол үшін ертерек мазасызданады, ал еркек бәрі дұрыс қой деп бейқам жүре береді.
Ерлердің миы көпшілігінде мәселені шешуге бағытталған. Тарс етіп мәселе шыққанда ғана оны шешуге тырысады. «Әйелім кетіп қалыпты, енді оны қайтару керек. Ажырасып кетіппіз, енді қайта қосылу керек» деген оймен жұмыс істейді. Құдай сақтасын, баласына бірдеңе болғанда ғана «Болды, баланың тәрбиесін қолға алу керек» дейді. Еркектер мәселе туындаған соң ғана келеді.
Сол үшін ер мен әйел ақылдасып отыруы керек. Ешқандай еркекте әйелдегідей эмоционалды интеллекті жоқ. Сезу, тану, білу деген сияқты. Сол үшін әйел бұл қасиеті арқылы еркекке көп пайда тигізе алады. Бекер айтпайды ғой, «әрбір жетістікке жеткен еркектің жанында әйелі болады» деп. Сондықтан еркектер, әйелді тыңдаңдар!», - деді ол.
Осылайша отбасылық психолог әйел мен ер адам ажырасуға жетпес үшін, отбасыны сақтап қалуда керек дүние – жиі сөйлесіп, ақылдасып, кеңесу керегін айтты.